關於我們
Hi! 我係Cecilia Tam 譚安琪。我係一個全職媽媽， 有兩位小朋友。
大仔出世之後， 我有一大段時間，冇為自己打扮， 著衫越嚟越求其，除咗出去食飯。
當大仔2歲左右，有一日，我睇咗一個節目。 講有幾個全職媽媽照顧小朋友十幾年。 當小朋友大個咗，媽媽終於可以出去玩。 個節目講佢哋去咗酒吧玩、跳舞。
個個媽媽都悉心打扮，著咗件吊帶背心， 雖然佢哋好靚、好有型、好性感， 但比起生之前嗰個時間， 已經唔同十幾年前嘅身形，唔係嗰個感覺， 但當然佢哋多就份成熟美、女人味。
當時我覺得，咁就冇咗十幾年青春。
點解唔珍惜每一刻嘅自己？為自己打扮一下，時間冇咗，就冇咗。。。
自從我係全職媽媽之後， 因為要湊小朋友嘅關係，咁我只可以喺屋企。
湊小朋友，就真係冇晒時間， 就算真係有，都只得好少。
有時，我會用呢啲好少嘅時間睇書、網上學習或者間唔中上堂學習關於著衫、 造衫等等嘅嘢。
因為全職湊小朋友，需要24小時全程貼身照顧、專注喺小朋友嗰到，跟住就有情緒嘅困擾。因為成日都掛住湊小朋友，就好似冇咗自己咁。
我將我嘅精神唔好淨係專注喺小朋友到，都要分啲時間專注喺自己到，打扮吓為吓自己，心情都會好啲。
過咗去唔緊要，把握自己呢一刻嘅時間，就可以。
我相信每一個人都可以為自己打扮，著返件啱自己身形嘅衫。
我覺得無論男或女、 高矮肥瘦、廿幾三十幾四十幾至到九十幾歲嘅人，都可以為自己打扮吓， 除咗愛錫身邊嘅人之外，都要錫吓自己。
記住，唔係同人比較，亦唔需要同人比較，只係自己對自己。就算，冇乜頭緒點著衫嘅人都唔緊要。 唔好浪費呢個時刻嘅自己。
喺我網店出售嘅衫，主要係適合上班返工，亦適合出去Gathering ，可以話係全天候嘅衫。
我公司嘅遠景係希望幫到冇乜頭緒點著衫嘅朋友，可以扮靚啲。 著衫襯衫靚咗之後，會更加增強佢嘅自信、諗嘅嘢自然會唔同咗。
之後，慢慢會改變一個女人嘅人生，佢嘅人際關係，亦都會改變，自然人都會開心啲。 如果單身嘅朋友，或者可以提升佢嘅姻緣。
所以珍惜現在，就由現在開始。
Facebook Business Page:
